Dünyanın ən sürətli lifti

Çinin Quançjou şəhərində Maliyyə Mərkəzinin binasında çalışan ziyarətçilər və işçilər mərtəbələr arasında hərəkət etməklə çox vaxt itirməyəcəklər.

AZƏRTAC xarici saytlara istinadla xəbər verir ki, sınaq zamanı lift dəqiqədə 1260 metr (saatda 76 kilometr) sürətlə binanın birinci və 95-ci mərtəbələri arasındakı məsafəni (440 metr) 43 saniyəyə qət edib.

Liftin belə yüksək hərəkət sürəti yeni elektrik daimi maqnitli sinxron mühərriklərin və bir sıra digər innovativ texnologiyaların, o cümlədən daha incə və möhkəm kabellərin, bütün informasiya axınını qəbul etməyə və emal etməyə qadir olan kompakt intellektual idarəetmə sisteminin istifadəsi nəticəsində əldə edilib.

Bundan əlavə, yeni sistem fövqəladə əyləc zamanı yüksək temperaturlara tab gətirə bilən yüksək performanslı əyləclərlə təchiz olunub. Lift vaqonu təzyiq kompensasiyası sistemi ilə təchiz edilib ki, bu da yüksək sürətlə enmə və ya qalxma zamanı sərnişinlərin qulaqlarını tıxanmamağa imkan verir.